Heidra med pris for digital eigedomshandel

– Det er med stor ære vi mottek denne prisen! Det er inspirerande at arbeidet vi gjer i Noreg blir lagt merke til internasjonalt. Samarbeidet vi har fått til i prosjektet, mellom bankar, eigedomsmeklarar og Kartverket, er unikt, seier Ida Haukedalen i Kartverkets eigendomsdivisjon.

«Digital samhandling ved eigedomshandel», som er eit prosjekt eigd i samarbeid med DSOP (digital samhandling offentleg privat), har spart samfunnet for milliardbeløp gjennom å digitalisere ein tidlegare papirtung prosess.

– Det er eigentleg ganske klisjéprega, men ein har innsett at ein ikkje klarer å digitalisera verdikjeda åleine. I staden har me berre bretta opp ermane og samarbeidd. Vi har samla relevante aktørar rundt ei felles målsetting, gitt og teke litt, litt dugnadsånd rett og slett – og så har det gått sabla bra, seier Haukedalen.

Prisen for «Excellence in National Mapping for Financial Services» på Geospatial World Excellence Awards blei motteke av Evert Flier, internasjonal koordinator sjø i Kartverket.

Konferanse om geodatakoordinering

Geospatial World Forum er ein internasjonal konferanse som i hovudsak handlar om geodatakoordinering. Konferansen har eit breitt perspektiv på teknologiutvikling og offentleg-privat samarbeid. 

Det er sjuande året Geospatial World Forum blir arrangert, og dei siste to åra har også marine geodata vorte inkludert i programmet.

Som nasjonal geodatakoordinator er geodatakoordinering er ei av Kartverket sine viktigaste roller. Internasjonal koordinator Evert Flier heldt ein innlegg på konferansen kor han snakka om korleis hydrografi (marine geodata) kan understøtte den marine strategien til den norske regjeringa. Flier deltok også i ein panelsamtale i sesjonen «Hydrospatial Infrastructure and Blue Economy Summit».

Noreg har vore eit føregangsland

Noreg er eit av dei første landa som begynte med heiskapeleg arealplanlegging for sine hav- og kystområde. I 2005 blei til dømes det tverretatlege kartleggingsprogrammet Mareano etablert for å samle inn kunnskap om havet, der Kartverket fekk ansvaret for havbotn-terrengdata. Etter kvart blei «Arealverktøy for havforvalting» etablert av Kartverket i samarbeid med Barentswatch og Miljødirektoratet. No vidareutviklar Kartverket eit FAIR*-dashboard for Mareano-datasett, direkte tilgjengeleg i geodataportalen Geonorge.

*FAIR står for Findable, Accessible, Interoperable og Re-usable. På norsk kan vi seie at data skal vere gjenfinnbare, tilgjengelege, samhandlande og gjenbrukbare. FAIR-prinsippa er generelle og overordna prinsipp for datahandtering som har fått ein viktig plass i policyar og retningslinjer for opne data. Det handlar om om å handtere og beskrive data på ein måte som gjer andre i stand til å forstå, bruke og analysere dei i framtida.