Nasjonalt grunnkart for arealanalyse: Årsversjon 2025 publisert som WMS
Første årsversjon av nasjonalt grunnkart for arealanalyse er no tilgjengeleg som digital kartløysing, WMS (Web Map Service). «Julegåva» frå NIBIO, SSB, Kartverket og Miljødirektoratet, skal gjere det enklare å ta gode, kunnskapsbaserte avgjerder om arealbruk i Noreg.
Den digitale kartløysinga (WMS) finn du på Geonorge: Nasjonalt grunnkart for arealanalyse WMS – årsversjon 2025
Grunnkart for arealanalyse skal sikre at brukarane får tilgang til oppdatert og påliteleg informasjon som er viktig for å kunne ta informerte avgjerder om arealbruk og ressursforvaltning, både i by og på land. Det er utvikla i samarbeid mellom NIBIO, SSB, Kartverket og Miljødirektoratet.
Ein ny rapport omtalar endringar som er gjorde sidan testversjon 2 av grunnkartet: Nasjonalt grunnkart for arealanalyse – Årsversjon 2025 - Nasjonalt vitenarkiv
Vektordata kjem i januar
Datasettet for årsversjon 2025 av nasjonalt grunnkart for arealanalyse, blir publisert på Geonorge i løpet av januar. I mellomtida kan testversjon 2 av datasettet lastast ned frå Geonorge: Nasjonalt grunnkart for arealanalyse (Testversjon 2) - Kartkatalogen
Grunnlag for «kart over grå areal»
Grunnkartet er hovudkjelde til «kart over grå areal» som Miljødirektoratet lanserte 16. desember, etter at Stortinget i revidert nasjonalbudsjett for 2025 bad regjeringa om å utarbeide eit kart over grått areal i Noreg. Målet er at dette kartet skal gjere det enklare å planlegge utbygging, i allereie utbygde område for å unngå å ta i bruk nye natur- og landbruksområde.
Et verktøy for å sjå heilheita
Norske kommunar og fylke jobbar allereie med å etablere lokale og regionale arealrekneskap. Nokre har vedteke eit prinsipp om arealnøytralitet. Samtidig har fleire kommunar hatt problem med å få oversikt over konsekvensane av nedbygging, mellom anna fordi viktige kart ikkje har vore samanstilt og dermed har vore vanskelege å bruke.
Grunnkartet for arealanalyse gir eit viktig kunnskapsgrunnlag for analysar og arealrekneskap på lokalt, regionalt og nasjonalt nivå.
Fakta
Nasjonalt grunnkart for arealanalyse er basert på eksisterande data frå det offentlege kartgrunnlaget (DOK), som viser arealressurs- og arealbruksdata, og inneber ingen nykartlegging. I tillegg er det lagt inn økosysteminformasjon i samsvar med Eurostats klassifikasjonssystem.
Grunnkartet kan koplast mot andre datakjelder, t.d. arealplanar, og er meint som eit felles datagrunnlag for ulike typar arealanalysar.
Den første versjonen het «grunnkart for arealregnskap».
Tidlegare i år inngjekk Kartverket, Norsk institutt for bioøkonomi (NIBIO), Miljødirektoratet og Statistisk sentralbyrå (SSB) ein samarbeidsavtale for å vidareutvikle og forvalte grunnkartet.
E-posten er sendt