Nytt grunnkart gir betre kunnskapsgrunnlag for arealbruk i Noreg

Årsversjon 2025 av «Grunnkart for arealanalyse» er tilgjengeleg som datasett og digital kartløysing, WMS (Web Map Service). Kartet er utvikla i samarbeid mellom NIBIO, SSB, Kartverket og Miljødirektoratet, og med omfattande brukarmedverknad.

Samanstiller dei viktigaste arealdata

«Nasjonalt grunnkart for arealanalyse» er ei samanstilling av data frå det offentlege kartgrunnlaget (DOK), som er dei viktigaste offentlege datasetta for heildekkande arealinformasjon i Noreg. Kartet inneheld òg ei inndeling i økosystem.

– Resultatet er eitt felles datasett som skal sikre at brukarane får tilgang til oppdatert og påliteleg informasjon som er viktig for å kunne ta informerte avgjerder om arealbruk og ressursforvaltning, både i by og land, seier kartverkssjef Johnny Welle.

Kartverktøy for ulike arealrekneskap

Grunnkartet gir betre oversikt over arealressursane våre, korleis dei blir brukt, og kva nye inngrep kan bety for klima, natur og andre viktige verdiar. Kunnskapen kan koplast til arealplanar og brukast saman med andre datasett for å vurdere konsekvensar av ny utbygging. Dette gir kommunar, fylke og statlege etatar eit felles grunnlag for arealanalyse og arealrekneskap.

– Grunnkartet løyser ei rekkje tekniske utfordringar og gjer arbeidet med plan og rekneskap enklare for kommunane. Det er eit særs godt døme på effektivisering i offentleg sektor, seier kommunal- og distriktsminister Bjørnar Skjæran.

Mange kommunar og fylke arbeider allereie med å etablere lokale og regionale arealrekneskap. Nokre har vedteke eit prinsipp om arealnøytralitet. Samtidig har fleire kommunar hatt problem med å få oversikt over konsekvensane av nedbygging, mellom anna fordi viktige kart ikkje har vore samanstilt og dermed har vore vanskelege å bruke.

Grunnlag for «kart over grå areal»

Grunnkartet er hovudkjelde til den første versjonen av eit «kart over grå areal» som Miljødirektoratet lanserte 16. desember, etter at Stortinget i revidert nasjonalbudsjett for 2025 bad regjeringa om å utarbeide eit kart over grått areal i Noreg. Grå areal er areal som allereie er teke i bruk, eller er sterkt påverka av menneskeleg byggeaktivitet.

Målet er at dette kartet skal gjere det enklare å planlegge utbygging, i allereie utbygde område for å unngå å ta i bruk nye natur- og landbruksområde.

Datasett og kartløysing (WMS) på Geonorge

Datasettet for årsversjon 2025 av «Nasjonalt grunnkart for arealanalyse» og den digitale kartløysinga (WMS), finn du på Geonorge:

• Datasett: Nasjonalt grunnkart for arealanalyse – Årsversjon 2025 (Geonorge)
• WMS: Nasjonalt grunnkart for arealanalyse WMS – årsversjon 2025 (Geonorge)

Sjå rapport som omtalar endringar gjorde sidan testversjon 2 av grunnkartet: Forskingsrapport: Nasjonalt grunnkart for arealanalyse – årsversjon 2025