Styrkar global skipsfart ytterlegare

Dei siste fem åra har Canadian Hydrographic Service (CHS) samarbeidd tett med PRIMAR om digitale verktøy for å vere klare for å distribuere ein ny serie standardar, S-100. Samarbeidet har gjort at Canada no er i front når det gjeld hydrografisk innovasjon.

Standardserien S-100 gjer det mogleg å kombinere elektroniske sjøkart med andre viktige datasett som tidvatn, straum, vêr- og isdata. For eksempel er tenesta detaljerte terrengmodellar (S-102) allereie tilgjengeleg via PRIMAR – og her er Canada og Noreg i tet.

Internasjonalt samarbeid leia av Kartverket

Kartverket har drifta PRIMAR på ikkje-kommersiell basis heilt sidan oppstarten i 1999.

– Det er ei stor anerkjenning for vår innsats på produktutvikling og innovasjon at Canada, landet med verdas lengste kystlinje, har valt Kartverket og PRIMAR som samarbeidspartnar på utvikling av sjøkart, seier kartverkssjef Johnny Welle.

Canada sitt medlemskap i PRIMAR styrkar samarbeidet mellom det kanadiske sjøkartverket CHS og sjøkartverk i andre land, og vil vere med på å drive nyskaping og kvalitet i hydrografiske tenester.

– Å bli fullverdig medlem viser kor viktig Canada meiner det er å forbetre sikkerheita og effektiviteten til sjøfarten. Gjennom dette samarbeidet kan vi bruke PRIMAR sitt nettverk og kunnskap for å gi sjøfolk meir presis og oppdatert navigasjonsinformasjon, seier direktør Louis Maltais i Navigation Geospatial Services and Support ved CHS.

Saumlaus navigasjon i sjøkart

Saumlause sjøkart gir ein tryggare og meir effektiv sjøtrafikk. No er kanadiske sjøkart (ENC-ar), digitale nautiske publikasjonar og nye S-100-tenestar med i det globale navigasjonssystemet PRIMAR tilbyr.

Allereie er ein viktig milepæl nådd: I juni lanserte det kanadiske sjøkartverket CHS dei første operative S-101-datasetta. S-101 er ein ny internasjonal standard for elektroniske sjøkart (ENC), utvikla av den internasjonale hydrografiske organisasjonen (IHO), som skal støtte framtidenes digitale navigasjon og e-navigasjon. Den definerer korleis kartdata skal verte strukturert, koda og vist i elektroniske navigasjonssystem (ECDIS).

– Dette og kommande S-100-forsøk i Canada blir den ultimate testen av dei nye verktøya for distribusjon av S-100 – før dei formelle måla for operasjonalisering av S-100 blir sett av IHO og den internasjonale maritime organisasjonen (IMO) i januar 2026, seier Maltais.

Canada er 19. medlemsland

Den bilaterale avtalen mellom Canada og Noreg blei signert i Stavanger den 7. mai av direktør Louis Maltais i Navigation Geospatial Services and Support ved CHS og kartverkssjef Johnny Welle. Canada er det 19. medlemslandet i PRIMAR.